الأيام الصعبة في حياة رفيقة عمرى: ١٠ أيام علي هذا الجهاز الشؤم! + لا يمنع حذر من قدر

 ــــــــ

 ــ لايمنع حذر من قدر ــ

*  بدأت أشعر بالندم وتأنيب الضمير والإحساس بالذنب نحو زوجتي ورفيقة عمرى فيما أصبحت حالتها الخطيرة الآن نتيجة لموافقتي علي دخولها هذا المستشفي المنزلي المزعوم الذى تحول أخيرا ألي مشرحة! وهي ياعيني ماكانش لها رأى في الموضوع ومعتقدة أننا أنا وأولادها سوف نفعل المطلوب فعله في هذه الحالة ، وأنا كنت في حالة هلع عندما انخفض الضغط عندها خلال ساعة زمن من ٨٠/٥٠ إلي ٥٠/٣٠ وخشيت من توالي الانخفاض بمثل هذه السرعة ويحدث مالا تحمد عقباه ، فلم أعترض علي طلب هذا الطبيب عودتها للعناية ، وأقول "العناية" وليس هناك أى جهة يمكن أن تفعل ماتفعله "العناية" ، فلم نلجأ إلي دجال أو سحار أو معالج روحاني أو محل عطارة! وعموما: "لا يمنع حذر من قدر"!

 10 أيام علي جهاز التنفس الصناعي!

* النهارده ١٧ منه وبقالها ١٠ أيام علي هذا الجهاز الشؤم! قلت لإسلام وأنا أتأهب للنوم: بقالها ممدة قدامنا ١٠ أيام ومش عارفين نعمل لها حاجة! ثم دعوت لها: ربنا يجعل صبرها سنتين علي الألم في ميزان حسناتها ، فرد قائلا: اللهم آمين ثم دخلت الحجرة ورحت أرتب البطانية والدموع تتدفق من عينيا ، وأنا أتخيلها علي مقعدها متتدد الأغراض وهي تطلب مني ترك ريموت الشاشة لتغلقها بمعرفتها عندما تنوى النوم مش عارف لما أصحي بعد انفضاض القوم ، عيالي وطاقم العناية ، وأجد نفسي وحيدا في هذه الشقة ، ووداد مش موجودة ،حعمل إيه؟! مش بعيد يجيني لوثة أو فقدان ذاكرة أو زهايمر! بحاول أقرأ تجارب الرجال اللي فقدوا زوجاتهم وكيف استطاعوا مواصلة الحياة وقبل كده كنت أشفق علي أى واحد فقد زوجته مثل زميل العمل في تدريس النواد الاجتماعية في الناصرية الثانوية عبد الحميد محجوب أو زميل بعثة الإعارة في ليبيا محمود مصيلحي أو جارنا وزميل العمل في التربية والتعليم في إدارة المنتزه التعليمية محمود فياض! مش عارف إيه الصداع اللي بدأت أشعر به في مؤخرة الرأس!

ــ الكتابة الوهمية ــ

*  تصورت أني بكتب الكلام ده بإصبع يدى وأنا في خبال النوم علي ورق فوق المخدة علي أساس تصويره بدلا من إعادة كتابته ، ولما قمت وفتحت الموبايل للتصوير لم أجد أثرا لماكتبته!

 يخرب بيت اللي اخترعه!

* الله يخرب بيت اللي اخترع الجهاز ده اللي الكل يشهد إن مضاره أكثر من فوايده واللي يتحطةعليه ينجو بأعجوبة خصوصا إذا كان من كبار السن أو ذوى الأمراض المزمنة ويخرب بيتك ياناقورى اللي فشل في علاج الالتهاب الشبه رئوى وطلب دخولها المستشفي والشماشرجي بتاعه الممرض أحمد الناعم اللي كان بينقل لنا طلباته بحماس زائد ، وألبرت إبراهيم اللي أشار علينا بالعناية المنزلية ، وماجد اللي طلب رجوعها فورا للعناية لما لقي ضغطها انخفض! وفي كل هذه الخطوات كانت هي لا بيها ولا عليها وغير متحمسة لها بالمرة! وقالت مرة: كل مايتكلموا عن المستشفيات تيجي فيا! العبارة دى تطاردني باستمرار وبعتبر نفسي مسئول عن كل اللي حصل لها ، وكان المفروض لما سمعتها بتقول كده كنت استبعدت فكرة المستشفي من أساسها ، ولو إني قاومت علي آخر مما استطعت ، ولكنه القدر!

الأيام الصعبة في حياة شريكة حياتي: رفيقة عمرى علي جهاز الغسيل الكلوى!

ـــــــــــ

وداد علي جهازي التنفس الصناعي والغسيل الكلوى
غسيل كلوى لوداد !

*  وربنا يجعله بفايدة ويكفيها شر مخاطره وخصوصا وهي في هذه الحالة ، ويكون هذه المرة فقط ثم تستغني عنه

 يعني هي دلوقت متوصلة بجهازين كل منهما أخطر من التاني ، وسبحان من كتب لها الحياة بعد كده ماكانش فيه اختيار تاتي ، وإلا نبقي قررنا موتها البطئ 

اللهم لا حول ولا قوة إلا بك ، ولله الأمر من قبل ومن بعد

 اللهم هئ لها مافيه الخير ، اللهم اجعل الحياة زيادة لها في كل خير واجعل الموت راحة لها من كل شر 

اللهم الطف بها وبنا وهون عليها وعلينا

*  توسعوا بكده في إشغال الشقة بدخول أجهزة الغسيل الكلوى وتوصيلاتها حتي الحمام ، وتواجد عنصر طبي ثالث لمتابعة عملية الغسيل!

* بقالها النهارده أسبوعين علي جهاز التنفس الصناعي ، يعني كمان أسبوع تكمل ٢١ يوم ، ولو لم يتم الاستغناء عنه يبقي لازم يشيلوا خرطوم الفم ويعملوا فتحة في الحنجرة لتوصيل الهواء للرئتين!

بعد انتهاء جلسة الغسيل الكلوى وظهور بعض النتائج المبشرة ، استأذنني إسلام في السفر لمباشرة عمله ، فقلت له إن ياسر كمان راجع السعودية بكره أو بعده ، ويبقي مافيش غيرى أنا وداليا مش حنقدر أصلا نتبادل الوقت لوحدنا ، ونسيت أقول له إن داليا ممكن تجبر علي العودة لشغلها لأنها ماعندهاش إجازات! لكن انت كتر خيرك علي كده وعملت اللي عليك وزيادة ..اتفضل سافر وربنا يسلمك في طريقك ويقويك. لما كلمت داليا وياسر بعد كده فضلت برده متضايق ، ووالله العظيم كنت في قرارة نفسي محتاج أكلمها هي ، واستفقت فورا إنها هي المريضة! لقد كانت بمثابة أمي وكانت الملجأ الوحيد أمامي لأشكو وجيعتي ، وسواء كانت صحية أو مادية أو اجتماعية ، وكانت دائما تريحني بحلول بسيطة أو تنصحني بأخذ الأمور ببساطة وأن الأمر لا يستحق الزعل ، وتلتمس العذر لأى حد أخطأ معي أو أمامي.

* فوجئت بوجود طبيب العناية اللي كان آخر واحد جاء ليقنعنا بأنها محتاجة لوضعها علي جهاز التنفس الصناعي فورا ، فكلمته وقلت له إنه زى مادخلها الجهاز يطلعها منه ، فكانت إجابته هي نفسها "قول يارب" وقال إنها لو ماتحطتش ع الجهاز كان نفسها حيتوقف! 

ولما قلت له إنها بقالها أسبوعين ، وبعد أسبوع يتعين فتح شق حنجرى بدلا من وضع الخرطوم في الحلق ، لقيته بيقول ياريت تعرفوا تنقىوها لجمال عبد الناصر ، وهنا تملكني الخوف من احتماليية استمرارها كذلك إلي أجل غير مسمي!

*

غسيل كلوى لوداد وربنا يجعله بفدايدة ويكفيها شر مخاطره وخصوصا وهي في هذه الحالة ، ويكون هذه المرة فقط ثم تستغني عنه يعني هي دلوقت متوصلة بجهازين كلا منهما أخطر من التاني وسبحان من متب لها الحياة بعد كده ماكانش فيه اختيار تاتي ، وإلا نبقي قررنا موتها البطئ اللهم لا حول ولا قوة إلا بك ولله الأمر من قبل ومن بعد اللهم هئ لها مافيه الخير اللهم اجعل الحياة زياظة لها في كل خير واجعل الموت راحة لها من كل شر اللهم الطف بها وبنا وهون عليها وعلينا توسعوا بكده في إشغال الشقة بدخول أجهزة الغسيل الكلوى وتوصيلاتها حتي الحمام وتواجد عنصر طبي ثالث لمتابعة عملية الغسيل!

* بقالها النهارده ٣ أسابيع علي جهاز التنفس الصناعي يعني ٢١ يوم ولو لم يتم الاستغناء عنه يبقي لازم يشيلوا خرطوم الفم ويعملوا فتحة في الحنجرة لتوصيل الهواء للرئتين!

* كنت عاوز أفرحها النهارده إني خلعت الضرس اللي كان معذبني وماكنتش عارف أستطعم الأكل اللي باكله لأنه كان ملخلخ وقابب عن صف الأسنان ومانعني من دغدغة الطعام علي الجانب الآخر لأني كنت بتجنب الأكل علي نفس الجانب كانت حتفرح وتقوللي فداك وتنبسط من أسامة اللي جابلي الدكتور لحد البيت وقام بعملية الخلع.. طبعا داليا وياسر انبسطوا ، لكن لا أحد يمكن أن يغنيني عنها وعن انطباعاتها وعن مشاعرها وعن إحساسها بي وقبل كده كنت عاوز أفرحها باختفاء التورم من رجليا واللي فشلت محاولات التغلب عليه طويلا ، عندما كنت أتناول مدرات البول ويترتب عليها مشاكل في الضغط ، إلي أن وصف لي د. ألبرت ضرورة النوم علي مخدة واحدة ووضع القدمين علي مخدتين وهو ده نفس الحل اللي كان يريحها من التورم برده لو لم تدخل العناية وتتعرض لكل اللي اتعرضت له حتي وصلت لوضعها علي جهاز التنفس الصناعي ثم الغسيل الكلوى!!

 

 

 

الأيام الصعبة في حياة شريكة حياتي: فشل فكرة دخول مستشفي جمال عبد الناصر

   ــــــــــــــــ

مستشفي جمال عبد الناصر للتأمين الصحي

 بعدما جاب إسلام واسطة لإدخال مامته العناية بمستشفي جمال عبد الناصر انتظروا عربة الإسعاف اللي اتفقوا معاهم بالليل ، ماجاتش واضح إنهم لقوا تعليمات بعدم نقل مرضي للمستشفي وهكذا تستطيع واحدة تعطيل منظومة كاملة لأن لها كلمة في البلد علما بأنهم لما اتصلوا بالخط الساخن وجهوهم لنقلها بالإسعاف إلي هذا المستشفي ، ولو ماعندهومش مكان يحولوها لإحدى المستشفيات الخاصة المتعاقدين معداها المهم إن إسلام وياسر توجهوا للمستشفي لمقابلة المديرة بناءةع الواسطة اللي معاهم وللأسف فقد أقنعتهم ألا ظاعي لعنلية النقل طالما أن العلاج في الاتين زى بعضه وهم أصلا مش هاين عليهم شحططة أمهم وبهدلتها في عملية النقل وبناء عليه فسوف يستمر الوضع إلي أجل غير مسمي ولما رجعوا بالنتيجة دى قلتلهم كان نفسي أرتاح من الأشكال دى اللي جايين ياكلوا ويشربوا ويتسلوا ويقبضوا علي مرضها وهم عارفين إنها مش حتخف وكل يوم بييجوا بترجع أكتر للوراء! بحق أذان المغرب يارب عدى الأيام دى علي خير والطف بها حية أو ميتة وهون عليهاةحية أو ميتة ، لأني لا أعرف أن كانت حية أو ميتة ، ولما بشوف داليا وهي بتكلمها الصبح وتنده عليها ياللا ياماما اصحي بقي مش ارتحتي كده ، قلبي بيتمزق عليها وعلي مامتها! وهي وأسلام بيتصوروا أنها بتفتح عينيها وعاوزة تتكلم ومعتقظين أنها علي وشك الفوقان!

ـــــــــــ

شهر رمضان علي الأبواب
 أكبر حاجتين مزعلني إنها أولا مش حتكون معانا في الأيام المفترجة دى والتي يستعد الناس فيها لاستقبال شهر رمضان ، وشوف يوم الرفرافة يعدى علينا أنا وعيالها وخاصة داليا وأسرتها اللي متعودين يفطروا معانا أول يوم في رمضان! الحاجة التانية اللي اتحرمت هي منها هي رؤية أول طفل لآية حفيدتها "يونس" والمولود في ١٥ نوفمبر الماضي ، وأكيد كلهم كانوا منتظرين هذا اللقاء بلهفة شديدة ومدى فرحة جدتهم برؤية يونس وحمله واحتضانه وتقبيله! ومن أسبوع فقط ماكانش يخطر علي بالنا إنها سوف تختفي من حياتنا بهذه السرعة وبهذه الطريقة المأساوية! يعني استمرار وضعها علي هذا الجهاز الشؤم إلي أجل غير مسمي ، ومش عارفين إذا كانت حية وتدب فيها الروح ، واللا توفت وأصبح اللي قدامنا هو جثمانها الطاهر!

بكائيات عبد السلام: وداد في ذمة الله!

ـــ وداد في ذمة الله ـــ

خلاص أتي أمر الله اليوم اللي ماكنتش عاوز أشوفه ماتت وداد! زوجتي وحبيبتي وشريكة حياتي ورفيقة عمرى وتوأم روحي ، بل واللي أصبحت بديل أمي التي رحلت منذ 22 عاما أصبحت وداد في ءذمة الله انتقلت إلي رحاب الله لقد تعذبت وتحملت الكثير خلال الشهر الأخير لم تصارع المرض ولكنها صارعت تجار المستشفيات وعديمي الضمير بعدماوقعنافي شراك مايسمس "العناية المركزية في البيت" أو" المستشفي المتزلي" وماهم بعناية ولا مستشفي إنهم حشد من الأطباء والممرضين لا يظلهم كادر بسشرى ولكنهم يعملون باليومية ويتقاضون أجورهم باليومية (للحديث بقية)

النهارده الجمعة ٢٧ من شعبان ١٤٤٥/ ٨ مارس ٢٠٢٤ وعقب صلاة الجمعة في جامع المواساة أدينا صلاة الجنازة علي روحها الطاهرة وقمنا بدفنها في مدافن الناصرية ، الي تقع في حي برج العرب ، لتصبح ثاني من يدفن هناك بعد شقيقتي نعيمة ، بعدما ظلت مغلقة علي مدى نحو ٢٢ سنة

رجعنا الشقة بدونها لكي أبدأ حياة عزوبية متأخرة ، ترفرف عليها ذكريات سعيدة ، وكأنني استيقظت من حلم جميل علي كابوس مخيف!

حمادة اتصل بي حوالي الساعة ٤ ص عندما رآني سهران ع الجروب وناقش معي فكرة الإقامة في دار مسنين وحذرني من الحمام المشترك مع آخرين ، مما جعلني أصرف نظر عن الفكرة

داليا استأذنت وروحت هي وأسرتها ، وسألت إسلام متي يسافر فقال أنه قاعد ليوم الاتنين طيب وبعد كده؟ ياسر وزوجته بسنت وطلبوا مني المعيشة معهم في الرياض أو ع الأقل مشاركتهم في أداء عمرة

اللهم اغفر لها وارحمها وعافها واعف عنها وأكرم نزلها ووسع مدخلها وطيب ثراها وأحسن مثواها واغسلها بالماء والثلج والبرد ونقها من الذنوب كما ينقي الثوب الأبيض من الدنس وأبدلها دارا خيرا من دارها وأهلا خيرا من أهلها وأدخلها الجنة وإعذها من عذاب القبر وعذاب النار

السبت ٩ مارس "صباحية" وفاة وداد! اتجمعنا النهارده داليا وإسلام وأسرتيهما وأنا بس كان الكرسي بتاعها خاليا! ورغم المحاولات المتبادلة لجعله يوما عاديا ، فقد كان الحزن يخيم عليه.. عن نفسي فلم تغب عن ذهني لحظة واحدة..ومابين وقت وآخر لازم يخطر علي بالي حاجة من الحاجات التي تتميز بها وأقوم بالحديث عنها مش قادر أصدق إنها خلاص لم يعد لها وجود وتحولت إلي رصيد ضخم من الذكريات السعيدة ، انتهت بتلك الأيام التي قضتها في "العناية" المزعومة وأدت إلي وفاتها بعد قضاء ٨ أيام في عناية جمأل عبدالناصر

وفي محاولة للحديث عنها بواقغية ، طرحت داليا موضوع الصدقة الجارية وهي يعتبر التبرع لدار رعاية الأيتام اللي أقامها الزميل عبد الننعم شيبوب صدقة جارية أم لا ، ثن تحدثنا عن تسليم بقايا الأدوية الكثيرة ألي أحد المساجد ،والكرسي المتحرك إلي إحدى المستشفيات ، وبعدين لما نزلت داليا سألت أسرة إسلام عن المكان الناسب لوضع صورتهاالمكبرة المنتظر عملها ، وأنا في دماغي مكان لا يخطر علي بال أحد الساعة 1.15 تقريبا وأحاول أنام بدرى شوية

 فيه آية في سورة المجادلة لازم أتوقف عندها وأفتكر وداد كلما ختمت القرآن الكريم وهي الآية رقم ١٢ { يَا أَيُّهَا الَّذِينَ آمَنُوا إِذَا نَاجَيْتُمُ الرَّسُولَ فَقَدِّمُوا بَيْنَ يَدَيْ نَجْوَاكُمْ صَدَقَةً ذَلِكَ خَيْرٌ لَّكُمْ وَأَطْهَرُ فَإِن لَّمْ تَجِدُوا فَإِنَّ اللَّهَ غَفُورٌ رَّحِيمٌ} في أيام الحج اللي قضيناها في المدينة ، كنا نتقابل كل ليلة خارج المسجد النبوى وكانت هي مصرة علي البحث عن متسول لكي تعطيه اللي فيه النصيب ، نظير مقابلتها للرسول في الروضة المشرفة وكنت أحاول صرف نظرها من منطلق استحالة وجود متسولين في السعودية ، ولكنها وعلي ضوء خبرتها السابقة خلال أداء العمرة مع شقيقتها مديحة خلال نفس العام ، كانت لا تعود إلي الفندق قبل إنجاز هذه المهمة وبالفعل كان يظهر المتسول أو المتسولة في آخر وقت ، فتعطيه اللي فيه النصيب من الريالات!

الحمد لله ع اللي يجيبوا ربنا عارف إن هي دى الحياة لكن المعرفة شئ وخوض التجربة شئ آخر ربنا مايوريكم فقد الحبيب والرفيق والصديق والعشير والصدر الحنون والقلب العطوف والسند الوحيد ومرفأ الأمان وملجأ الاطمئنان خصوصا في مثل هذه الأيام المفترجة ربنا مايحكم علي حد الليلة أول سحور وأول سحور في حياتي الزوجية بدون وداد والليلة أول صلاة تراويح وأول تراويح أؤديها والبيت خراب من غيرها كنا نصلي التراويح ونعمل شاى السهرة ومعاه حتة كنافة أو شوية قطايف وبعدين نتفرج معا علي برامج التليفزيون أو اللي تايز ينام ينام والتليفزيون شغال كانت هي تقرأ في صلاة التراويح جزء كامل من القرآن بحيث تختم القرآن مع نهاية الشهر وكنا متعودين من أول الجواز علي تأخير السحور عملا بالسنة النبوية ونصلي الفجر ونقرأ ماتيسر من القرآن إن قرآن الفجر كان مشهودا كل ده المفروض أعمله وهي مش موجودة والله أعلم هي فين دلوقت! يسألونك عن الروح قل الروح من أمر ربي وياما ناس كتبت مقالات وألفت كتب وقالت أحاديث عن الحياة بعد الموت ، لكن كلها اجتهادات شخصية هل هي حاسة بينا؟ هل هي مرتاحة واللا تعبانة؟ هل هي سعيدة واللا حزينة؟ هل هي تضحك أم تبكي؟ هل هي تتألم أم تتمتع؟ علمها عند الله وربنا لم يخبرنا بهذه الأمور وذلك كسر من أسرار الحياة الأخرى ولحكمة لا يعلمها إلا هو سبحانه وتعالي

 

الرسائل أرقام (1و 2 و3)

 ـــــــــــــ

 (1)

الغدة الدرقية

كلامكم انتم التلاتة ع الغدد ومحاولة داليا وإسلام إقناع مامتكم وإقناعي أنا كل علي انفراد بأخذ عينة من الغدة (الدرقية غالبا اللي بتوع الدوبلار قالوا إن مافيهاش حاجة باستثناء وجود نتوء صغير) وقولهما إن مستشفي مصطفي كامل هم اللي طلبوا ذلك في آخر يوم.. وطالما إنها ماكانتش لسه حاولت تتحرك عندهم بعد العملية.. يبقوا شاكين في الغدة ليه؟ إلا إذا كان المسح الذرى اللي لم ينتظروا نتيجته لإجراء العملية كما كانوا يقولون في البداية.. هل لما ظهرت نتيجته لقوا فيها حاجة؟ خصوصا إن الناقورى لما جه أول امبارح لم يشر إلي أى غدة من قريب أو بعيد والاحتمال الوحيد اللي قاله علشان صعوبة الحركة هو الأوردة وقال بعد التحليل ممكن نشوف حد بتاع أوردة يبص عليها. ولما سألته يبقي حيطلب دوبلار تاني ع الأوردة وهي عملته ومافيهوش حاجة قال أكيد مافيهوش حاجة لأن لو فيه حاجة كانت تصرخ لو حطت رجلها ع الأرض بس ممكن تكون الأوردة عاوزة تتنشط بس وده هو شغله يعني لم يتطرق إلي حاجة اسمها غدد وسامع إن إسلام لسه ماشي في حكاية العينة بجد وطالب يعرف الأدوية اللي بتاخدها قبل سحب العينة! ممكن بقي تفهموني لأن الواحد اللي فيه مكفيه ومش ناقصنا قلق جديد!

(2)

كويس والله الأسلوب ده اللي اتفقتم عليه! اتنين قرأوا كلامي وماردوش وواحد طنش الرسالة! بس كده أكدتم ظنوني! ياترى الموضوع ده في العظام واللا الدم؟! وعلي كده تبقي الغدد المقصودة هي الليمفاوية ومش عاوزين تقولوها صراحة! وإيه اللي مسكتكم لدلوقت وجايين فجأة تتحركوا؟ رغم إن ااموضوع ده مش بينتظر أيام مش شهور؟! طيب وبعد ما تسحبوا العينة وتتحللوها.. متوقعين إيه؟ هل مامتكم في السن ده والحالة دى تتحمل علاج بكل متطلباته؟ الساعة بقت ٢وشوية ومش عارف أنام! والأمر لله أولا وأخيرا!

(3)

بعد ما كلمتني وجبتها علي بلاطة وفاجأتني بالحقيقة المرة اللي كنت إنت واخواتك مخبيينها وعاملين زى النعامة في الهروب من الواقع ، مامتك بتسألني حمادة كان بيقولك إيه في الأوضة وانت بتقول لا حول ولاقوة إلا بالله؟ عملت نفسي فاقد الذاكرة تماما وقلتلها دماغي يظهر ضربت! قالتلي المهم تكون حاجة بعيد عنه هو قلتلها لأ مالوش علاقة بيها أنا فوجئت بالسؤال وهي ماشية قدامي راجعة من الحمام! ربنا يكون في عونها ويقويها ع الأيام اللي جاية أنا بتمزق من منظرها وهي بتزحف طول النهار ومكفية علي المشاية! يارب الحالة ماتتطورش أسوء من كده يارب ماشوفها تعبانة أكتر من كده مافيش ياعيني أبو تلات اللي كانت متعتها الوحيدة ولو حاولنا ورحنا مافيش سطوح خلاص هي لغاية دلوقتي بتعافر وتدخل الحمام وتتوضا وتدخل المطبخ وتطبخ مع داليا دايما يارب حسها ونفسها معنا مش متصور إزاى أقدر أشوفها تتعذب واللا أبص حواليا مالقاهاش قدامي! ياريت أى حاجة بخصوص التشخيص واللا العلاج تتم هنا في البيت لا أنا ولا هي مستعدين لخروجها من الشقة مش عارف اللي عندها ده يعتبر موضعي واللا إقليمى يعني منتشر! يارب هون يارب عمال طول النهار أقرأ في كيفية ممارسة مريض سرطان العظام حياته العادية ربنا يلطف بيها ولا يحملها مالا طاقة لها به ويعفو عنها وبزيح عنها وياخد بإيدها يارب ماتورينا فيها يوم وحش معلهش وجعت دماغك

الرسائل أرقام من 4 إلي 7

ـــــــ الرسالة رقم 4 ــــــ

بقي انت واخواتك عارفين إن السرطان انتشر عند أمكم من ٣ شهور ومالهاش علاج وسايبينها تموت موت بطئ؟! أنا مش عارف أنام لا ليل ولا نهار! عيني كل ماتغفل من شدة التعب والتفكير ، أقوم مفزوع ع الكابوس الحقيقي اللي جالنا علي آخر أيامنا لو بإيدى ماكنتش أعيش لحظة واحدة بعد كده! أعمل إيه أنا وهي دلوقت وازاى نقدر نواجه الموقف ده واحناالاتنين في أضعف حالاتنا من جميعه؟! وهل الحل إنكم تتهربوا من الكلام معايا وتتجاهلوا رسايلي؟! مافيش غير إسلام اللي بدأ يرد علي بعضها! بس مش مقتنع بكل مبرراته! ازاى هداكم تفكيركم ، بلاش طاوعكم قلبكم ، تعملوا معانا اللي عملتوه؟! وازاى صدقتم اللي أوهمكم بإنه مالوش علاج؟! وازاى اللي حواليكم وافقوكم علي كده؟! إذا كان وقتها منتشر قيراط فهو الآن منتشر ٢٤ قيراط بسبب تضييع الوقت ده كله! لولا الانتحار حرام ، لكنت جبت حباية الغلال وحطيتها لي ولها في كوباية عصير ونخلص من الكابوس ده! هي ياعيني وشها انقلب بمجرد ماقلتلها توقف دوا التجلط علشان التحليل يوم الخميس وقالتلي ليه التحليل قلتلها علشان يشوفوا الغدة فيها إيه قالتلي وهي كلها ثقة واطمئنان مانا قلتله يصرف نظر عن موضوع الغدة!!!! أمال لما تضطر تنزل معاكم كذا مرة وتكتشف في الآخر الحقيقة؟! يعني لو المشوار ده بدأ من ساعتها كانت دلوقت متقبلة الأمر ، خصوصا وإن اكتشاف المرض كان لسه حالا!

ــ الرسالة رقم 5 ــ

 أيوة ياحمادة أنا واقف جنبها وهي بترد عليك وكنت مطلعها ع السرير علشان النوم كابس عليها رغم إنها عارفة إن الضهر أذن وكانت ساعتها بتتألم من ركبتيها مش عارفة تفردهم ع السرير رغم إنها واخدة مسكن الأورام من ساعة وشوية لكن لقيتها بمجرد ماسمعت صوتك غيرت نبرات صوتها وقالتلك كويسة ياحمادة والحمد لله بديك فكرة بس ع الماشي ولو تشوفها وهي بتتحرك دلوقت فلن تتحمل رؤيتها ربنا له حكمة علشان تبقي طالعة من عملية المفصل "بالغة الخطورة" تلقي المرض اللعين منتشر في جسمها بمافيه الركبتين يعني محتاجة لتغيير مفصلين وهي في الحالة دى مش لو بدأ المشوار في حينه من ١٠٠يوم كانت النهارده بقت أفضل؟!

ــ الرسالة رقم 6 ــ

 أمكم انهارت في البكاء بصوت عالي وهي واقفة في المطبخ مستندة ع العصا من شدة الألم وقالت المسكن مش جايب معاها نتيجة وعمالة تتساءل إيه اللي عندها وأخدتها ف حضني وقعدت أمسح لها دموعها وأطيب خاطرها علي قد ماقدرت لكن حرام تسيبوها كده وتطمنوا علبها بالمراسلة وأنا لوحدى قربت أنهار قبل منها حد ييجي يقعد معاها ضرورى يونسها يشجعها بكلمتين أنا لا قادر أنام ولا أكل ولا أشرب وأتمني ربنا يعجل بأجلي في هذه اللحظة مش معقول أشغالكم أهم من حياة أمكم!

الرسالة رقم 7 ــ

  فكرتك لما قريت الكلام ده مامتك صعبت عليك! أتاريك بتقول لداليا نمرة الدكتور معاك ع الموبايل ولما تروح تشوفها وتبعتهالها!!!! يعني علي راحتك و أقل من مهلك! هي الدنيا طارت؟! أمك بتنازع من الوجع وداليا بتعمل لها كمادات بدون جدوى ياقلوبكم! مستنيين لما المرض اللي لايرحم يصيب أعضاءها الداخلية؟! وتكمل موت بطئ؟!

 

الرسالتان 8 و9

 ـــــ الرسالة رقم 8 ــــــ

مساء الخير ياحمادة مضطر أكلمكم تاني عن أمكم اللي عملتوه وبتعملوه معاها وهي مريضة بالسرطان لا يرضي عدو ولا حبيب وأنا بتفرج وبتألم وبحلم بكوابيس وببكي كل ماحطيت راسي ع المخدة وهي بتعاني وبتتوجع ومش بترتاح في النوم ومش قادرة تمشي علي رجليها وعمالة تمسح فخادها ودراعاتها وتصرخ من كعوب رجليها وانتم عمالين تضيعوا وقت لأنكم مش فاضيين لها ومشغولين بما هو أهم وقبل كده عرفتم إنها مصابة بدرجة كبيرة وكتمتم ع الخبر ٣ شهور كاملة والمرض سارح في جسمها وانتم معتبرينها انتهت ومافيش فايدة من محاولة علاجها ولما أنا عرفت وقلت نلحق ننقذ مايمكن إنقاذه ماعملتوش حاجة إيجابية غير تحليل الدرقية! وعدى شهر رابع ع الكلام ده الخلاصة إنكم أجرمتم في حقها وارتكبتم خطأ لا يغتفر ومافيش عندكم نية لإصلاح الخطأ والتحرك جديا لإنقاذها ومحاصرة المرض وإبقائها علي قيد الحياة أنا سبق وقلتلكم زى مابلغتوني بالحقيقةاقعدوا معاها واعترفوا باللي عملتوه وهي مش حاسة وهي في الحالة دى حتتقبل إنها تدخل التأمين الصحي وكان زمانها بدأت طريق العلاج وكل ده وعاملين قلبكم عليها وخايفين عليها لما تعرف إن عندها سرطان! لا أملك إلا أن أفوض أمرى وأمرها إلي الله وهو قادر يطلعها من الكرب اللي هي فيه وأخيرا نفسي أعرف مين اللي أشار عليكم بالشورة دى الغير معقولة ولا مقبولة ولامفهومة واللي مازلتم مستمرين ومصرين عليها ألا وهي تضييع أى بصيص أمل في علاجها

ــ الرسالة رقم 9 ــ

 أكيد أصبحتم كارهينني وكارهين رسايلي وبتقرأوها غصبا عنكم - إذا قرأتوها - لأنكم خلاص عملتم اللي تقدروا عليه وأزحتم المشكلة من دماكم وحطيتوها علي دماغي ، بحيث أعيش المأساة معها ليلا ونهارا ، وأتعذب نفسيا أكثر منها ، لأنها ربما يكون لديها بعض الأمل في الشفاء ، بينما أعرف الحقيقة المفزعة.. محدش منكم بيشوفها لما تصحي الصبح وقاعدة علي حرف السرير وكاشفة فخاذها ورجليها وعمالة تمسح فيها ومش قادرة تقوم من شدة الألم ، ولما سألتها أعملك الفطار قالتلي أفطر ازاى وأنا تعبانة كده؟ طيب هاتلي الأنبوبة المكتوب عليها فولتارين.. كمان شايفاني مش بفطر معاها (من سددان نفسي ..أنا امبارح واكل وجبة واحدة بتاعة الفطار تناولتها الساعة ٣ تقريبا رغم إن أسامة جابلي طقم الاسنان بعد تصليحه واللي كنت بحلم بيه) قالتلي لما أجوع حبقي أفطر ، رغم إنها طول حياتها كانت حريصة جدا علي تناول الفطار في موعده علشان كوباية الشاى.. لما راقت نسبيا من الألم توجهت للمطبخ رغم إني بفضل أجيب لها الفطار وهي قاعدة في مكانها في الآرش ، لكنها بترتاح في المطبخ أكتر ، وطبعا سبقتها للمطبخ ، لكن وهي علي الباب مدت إيدها علشان أساعدها تخطو خطوة ، قعدت قدام الترابيزة وقلتلها أسلق لك بيض واللا أحبشلك طبق فول قالت فول..جهزت لها الفطار وقلتلها بعد ماتفطرى سيبي كل حاجة مكانها وإوعي تقربي للحوض.. لما خلصت فطار وصلت الظهر معايا جماعة علشان تصحصح لأنها كانت بتنام فكرت إن نفعول المسكن بدأ يشتغل لكن للأسف لما جت تدخل حجرتها علشان تطلع السرير ماكانتش قادرة تحط رجلها علي الأرض ، وتعجبنا إن المسكن ماعملش حاجة رغم مرور ساعتين تقريبا ، ولما وصلت السرير طلبت مني أجيب أنبوبة مسكن قالت إنه مضاد حيوى وأدهن مكان الالم في رسغ وكعب الرجل الشمال معتقدة إنه عرق من العروق.. العجيب إن حمادة لما اتصل وهي في ذروة الألم لقيتها بتقول له إنها كويسة وبتضحك.. أنا بصحي الصبح مش عاوز أصحي وأفضل أدعي ربنا يعدى اليوم ده والأيام اللي بعده علي خير ، وقادر ربنا ينجيها من هذا المرض اللعين ، اللي ماكنتش متخيل إنه يوصل لعندنا مش لأننا محصنين ضده لكنه لم يخطر علي بالي ويصيب أمكم اللي يحلف بحياتها طوب الأرض ، كل الناس اللي عرفوها عن قرب أو بعد ، سوا كانوا زملاء في العمل أو جيران أو قرايب أو نسايب ، وعمرها ماتلفظت بلفظ غلط ولا جابت سيرة حد ولا سخرت من حد ، وطول عمرها في حالها ومتفرغة لبيتها وعيالها.. ولسه طالعة من عملية "بالغة الخطورة" هكذا كان تصنيفها ، ومالحقتش تتهني بنجاح العملية وتتحرك زى ماكانت ، لتدخل في صراع مع ذلك المرض اللعين.. في الوقت اللي عيالها ارتكبوا غلطتين شنيعتين في التعامل مع هذا الوحش المفترس: الأولي التكتيم علي الخبر وكأن شيئا لم يحدث ، زى النعامة التي تدفن رأسها في الرمال عند مطاردة الصيادين لها ، والثاني التباطؤ والتراخي في التحرك لما قلت خلاص اللي حصل حصل والمهم محاولة إنقاذ مايمكن إنقاذه.. والمصيبة هي تبني نظرية إن اكتشاف المرض لم يكن مبكرا وبناء عليه فمافيش فايدة ، ويبقي علي راحتنا وعلي أقل من مهلنا واحنا وظروفنا والدنيا ماطارتش ، ومش حنقطع روحنا.. علما بان ماحدش بيكتشف هذا المرض مبكرا وااناس يتقعد تلف علي الدكاترة شهور طويلة لما تكتشف في الآخر انه عندها.…وبصراحة اللي أوعز إليكم بهذا التفكير هو اللي أذاها وأذانا معاهاوأستبعد أن يكون طبيبا وأنا زعلان جدامن الناقورى لأنه عارف ووافق ع اللي عملتوه.. أنا حبيت بس أقرب إليكم الصورة اللي انتم بعيد عنها ومش حاسين بيها ومش عاطيينها الأولوية المطلقة اللي تستحقهاومشاغل الدنيا واخداكم ولاهياكم عنها.. وأرجع وأول إن ربنا أرحم بها مننا وأحن عليها مننا وقادر ينجيها وللعلم أنا متوقع ماحدش يفتحها ، ولو فتحها مش حيقراأها ولو قرأها مش حيستوعبها