ـــــــــ
* عدى أسبوع علي وفاة مامتك وهكذا يعدى شهر وتعدى سنة وتبقي ذكرى بس بقدر ماستصبح ذكرى سعيدة ستظل مؤلمة بسبب اللي حصل لها في السنتين الأخيرتين وخاصة شهر العناية المهببة
* جاية ع البخت مع رمضان وكعك العيد وعيد الأم والعيد وشم النسيم والرنجة وحضور آية بوليدها من السفر
* كنت دلوقتي واقع لا محالة في المطبخ وبنسبة ٩٠٪ لولا ستر ربنا وقدرت أتماسك
ولو حصل ووقعت وده احتمال وارد في أى لحظة
وممكن يحصل ف الحمام أو المطبخ لأن مافيش حاجة أستند عليها
المشكلة مش ف الوقوع ومايترتب عليه
المشكلة أقوم ازاى؟
لو جبت حد يقعد معايا ٢٤ ساعة
أولا لازم ياخد يوم اجازة
وفي اليوم ده أبقي لوحدى برده
ده لو استحملته
بفكر لو فيه دار متوفر فيها حجرة فردى بالحمام مهما كانت أجرتها
مش عارف ألاقي واللا لأ
تعرف إن مامتك ربنا أكرمها برده إنها اتوفت وأنا موجود
علي عكس ماكنت أتمني إني أموت قبلها
لأنها ماكانتش تقبل تسيب شقتها
رغم أن حاجات كتير ماكانتش تقدر تعملها بنفسها في الفترة الأخيرة
* قطيعة الكبر وسنينه!
مش كان عنده حق في جمهورية أفلاطون يتخلصوا من المواطن اللي يبلغ سن معين؟
* طول مانا قاعد وهي بصالي كده زى ماتكون واخدة علي خاطرها أو زعلانة ياترى زعلانة مني إني دخلتها العناية المهببة اللي أفقدتها حياتها؟ واللا زعلانة عليا وعلي حالتي بعد رحيلها؟ واللا زعلانة علي روحها من اللي حصل معاها علي أيدى هؤلاء الدجالين؟ واللا زعلانة علشان ماقدرتش تصوم وتصلي وتختم القرآن في رمضان اللي الناس بيدعوا طول السنة "اللهم بلغنا رمضان" ، وأللا تتلقي الهدايا من ولادها بمناسبة عيد الأم ، واللا تعمل معانا كعك العيد زى كل سنة بعدما سامح يحضرلها الدقيق من أول رمضان ، واللا تشوف يونس أول مولود لأول حفيدة عند نزوله اسكندرية لأول مرة، واللا تاكل الرنجة اللي جايباها سهي ومحطوطةوفي الفريزر علشان شم النسيم؟
ــــــــــــــ
* أصعب حاحة الشعور بإنك مش حتشوفها بعد كده!
كسروا القاعدة الصيني!
* البهايم بتوع العناية المهببة كسروا قاعدة التواليت اللي بقالها ٥٤ سنة!
شايفين الخرم اللي بيدخل فيه مسمار الغطا؟
طرشق وانفتح وأصبح الغطا متعلق علي ناحية واحدة
ومالوش علاج غير تغيير القاعدة كلها!
السباك لما شافه استغرب وقال إنه لأول مرة في حياته يلاقي المكان ده مكسور!
* بيتصلوا بيا مش عارف عايزين إيه واللا حيقولوا إيه بعد اللي عملوه؟
ليست هناك تعليقات:
إرسال تعليق