ــــــــــ
* يوم 26/4/2024
* الأحد 27 أبريل: عيني غفلت قمت بقرصة ناموسة
دورت علي وداد برضه
مفكر إنها قاعدة جنبي
قعدت أفكر هي راحت فين؟
* راحت عيني في النوم
صحيت أتساءل: راحت فين؟ مشكانت لسه معايا؟ وطول النهار مش كانت معايا؟
يااااااااااه!
دى ماتت!
ـــــــــ
* عمرى
مابكيت علي حد ، حتي أمي رغم أنها كانت أغلي الناس في حياتي بسبب اهتمامها
الخرافي بي وخوفها عليا من الهوا باعتبارى الولد الوحيد علي بنتين
وأنجبتني بعد فقدها ولدين!
ذلك لأني لم أعاشرها بقدر ماعاشرت زوجتي!
كنت أحتفظ بجميع خطاباتها لي في ملف خاص ، والتي كنا نتبادلها خلال فترتي
الخطوبة عندما كنت أعمل في الوجه القبلي وكانت هي مقيمة وتعمل في
الإسكندرية ، وفترة انتظار استقدامها كمرافقة لي أثناء الإعارة إلي ليبيا ،
والتي لم تستمر أكثر من ٣ شهور إلا الربع كنت أحلم فيها بالكوابيس وكان
رفيقي في الاستراحة يتعجب مني؟!
وعندما خرجت للمعاش وراجعت أوراقي ، وجدت هذا الملف وقد تضخم ، رغم أن
صفحاته كانت من الورق اللبني الخفيف ، بقيت محتار أعمل فيه إيه ، لدرجة ان
ابني ياسر اقترح عمل صندوق حديدى ووضع الملف بداخله وإرسال مفتاحه له في
الرياض ليحتفظ به مدى الحياة ويورثه لعياله!
وظللنا نعيش جنبا إلي جنب ومافيش ليلة لا أنا ولا هي بتناها بعيدين عن بعض ،
باستثناء فترات ندبي لأعمال الامتخانات خارج الإسكندرية!
ــــــــــــ
* كنت بنظف شنطة الخروج بتاعة مامتك لما لقيتها ع الكومودين عليها تراب أخدتها ورحت المطبخ ونظفتها ودخلتها الدولاب بتاعها وأنا قلبي يتمزق وعمال أردد ألف رحمةونور علي روحها الطاهرة ولا حول ولا قوة إلا بالله العلي ااعظيم ربنا يعوض صبرها خير ويجزيها خير عن حرمانها من استمرار الحياة معانا
* النهارده د. عبد الوهاب الأبجيجي ، حذر خلال برنامجه الإعلاني "دقيقة لصحتك" من "القلب المكسور broken heart" الناتج عن الإفراط في الشعوربالحزن علي فقد إنسان، لما يترتب عليه من مخاطرصحية..البوست الأصلي
* ربنا يرحمك ياحبيبتي ويحسن إليكي قعدت النهارده أفتكر لما كنتي بتيجي علي نفسك وتدخلي المطبخ علشان تعملي المسقعةبناءعلي طلبي ، وانتي قاعدة علي كرسي الحمام وتحركيه برجليكي وكأنك ماشية ، وفي المطبخ تنتقلي للكرسي اللي قدام الترابيزة وتقوليلي أعمل إيه خطوةخطوة وكنت أناللأسف أتضايق من كثرة تعليماتك وأنا لسه في خطوة معينة ، ولما ييجي وقت قلي الباذنجان كنتي تنتقلي إلي البوتاجاز علشان تقومي بعملية القلي بنفسك وتطلبي مني أقعد أستريح...إلخ كل ده بعدمالقيت الباذنجان اللي جبته من كام أسبوع علشان نعمل مسقعة ولكنه اتركن حتي بدأ العفن يصيبه وأنا حاليا نفسي في المسقعة دى بجانب السمك المشوى اللي جابه أمين ، بس رجليا وارمة وعينيا بتدمع بطريقة مزعجة وكنت عاوز أكمل نوم وأمدد رجليا واللي فكرني بيه لما داليا قاالتلي إن غداهم النهاره مسقعة وبطاطس محمرة ، وهي نفس الأكلة اللي كنت ناوى عليها حيعلهالي وجبت الباذنجان علشانها ولماقلت لرندا إني حطيت الباذنجان في الفريزر قالتلي يبوظ!
ليست هناك تعليقات:
إرسال تعليق