ـــ من خلال رسايل لإسلام ع الواتساب ـــ
* الجماعة دول ماشيين معانا بطريقة غريبة كل يوم باعتين لنا وجوه جديدة سوا ف الدكاترة أو التمريض ومنهم ناس لسه بيشتغلوا عندهم لأول مرة ، وكأننا حقل تجارب مع إن حالة زى دى عاوزة ناس يكونوا عارفينها ومتابعينها كويس ، دى حاجة والحاجة التانية امبارح جابولنا دكتور اسمه أحمد لطفي ده أصلا من كفر الشيخ وجتة بحجم باب الشقة وأول مرة يشتغل مع كير هب دول واشتغل عندنا ٢٤ ساعة لكن أجارك الله أول حاجة عملها إنه قعدلي ع الكنبة وتصدر الشقة وفضل يتكلم مع الممرض بصوت عالي وأجش ولا يحتمل وكنت ساعتها قاعد ع الكرسي اللي جنب شباك أوضة النوم أقرأ في المصحف فضلت أغلي والدم فاير في عروقي ومش عارف أتصرف معاه ازاى رحت قافل باب الحجرة ف وشه لقيته بعد شوية انكتم ومالوش حس ويظهر الممرض اللي معاه وهو محمد مجدى نبهه أننا مش عاوزين حد يقعد ف الصالة لأنه التزم بالحجرة بعد كده بس عنده مشكلة وهي التدخين بشراهة مما يجعله كل ربع ساعة يطلع من الشقة وأحيانا بيغيب مععرفش بيروح فين ومن رزالته بيطلع بشبشب الحمام بتاعي وبعدين وهو راجع يسيبه عند باب الشقة وفضل كده لغاية ماقلتله رجع الشبشب مكانه فضل بعد كده طالع داخل بشبشب سامح وماشوفتوش بيعمل حاجة مع مامتك إطلاقا والسخيف كمان إني لقيته الصبح قاعد بجتته الضخمة دىةع الفوتيه بالعرض ومدلدل رجليه تصور أنهو فوتيه يتحمل ده وكانه قاعد في بيتهم والأسخف إنه عاطي ضهره للأجهزة وموجه نفسه ناحية الصالة وعمال يلعب في الموبايل المهم إنه حطم أعصابي علي مدار يوم كامل فلو سمحت كلمهم بحدة شوية وقول لهم ليه بيبعتوا ناس جداد كل يوم ومايبعتوش الناس اللي اشتغلوا مع الحالة وفاهمينها وعارفيت تطوراتها؟ والحاجة التانية إني مش عاوز أشوف الجدع ده مرة تانية وكفاية المرار اللي غنا شايفه من العمالةبتوع الانابيب والغسيل الكلوى اللي ماتعرفش تكلم حد منهم إلا ويبجح فيك وكأننا في الشارع عموما أنا الآن بندم أشد الندم إني قبلت فكرة العناية عندنا ، اللي ثبت إنها تجربة فاشلة ١٠٠٪ وأخيرا أنا اللي بتحمل نتائجها لوحدى وغصب عني أواجه وأتعامل وأتعايش مع خليط عجيب من البشر
* الألعن بقي حصل دلوقت
الساعة قربت من ٥ ص
طلعت من حجرتي للوضوء والاستعداد لصلاة الفجر
أفاجأ بحد نايم مكاني ع الكنبة ومتغطي ببطانية اتضح إنها عباية
وقفت أبص عليه
الأول فكرته داليا
لقيت داليا جاية من أوضتها
قلت چني
لقيت لها دقن
قعدت ألف حواليه ومعتقد إنه إنت
لقيته حس بيا وراح قايم معتدل
أتاريه الطبيب
اللي جاى علشان يلاحظ المريضة
ماعندكش فكرة للي حصل
بهدلت أمه
وقلت له اللي عملته ده ماحصلش ولا مرة من يوم ماعملنا العناية
أنا مش بسمح لحد يقعد هنا وحاطط لكم فوتيه وكرسي سفرة في الحجرة
تقوم انت تتجرأ وتنام في المكان اللي هو بتاعي وتحط راسك علي مخدتي
ده زوج بنتي مايعملهاش
فاضل إنك تدخل حجرة نومي اللي جنبك بالمرة
مش كفاية مستحملين قرف المستشفي المنزلي
جاى انت كمان تنيلها وتحرق دمنا وتحطم أعصابنا فوق ماهي متحطمة
اسمه د. أحمد سعد
* بقول له فكرتك حد من عيالي
يقوللي كلنا عيالك
قلتله بس انت جاى لملاحظة المريضة ماتسبهاش لحظة واحدة
ماكنا استغنينا عن الطبيب بقي مادام مالوش لازمة
مش تنام وتتغطي
* أنا خلاص مش قادر أستحمل أكتر من كده
وخلاص بقيت لوحدى قدام العالم ديه
ده غير الشعور بالندم لأني قبلت فكرة العناية في المنزل واللي اتضح إن عيوبها أكتر من مزاياها
زائد الشعور بالذنب نحو مامتك لأني وافقت علي عودة العناية وهي ماكانتش محتاجة لها وماكناش متصورين إنها تعمل كل اللي عملته فيها!
* أهم دول ينطبق عليهم المثل:
سكتناله دخل بحماره!
يقوللي علي فكرة احنا بشر برده!
شوف الردود العجيبة!
قلتله شيل الشنطة اللي حاططها ع الفوتيه اللي بنقعدوا عليه وحطها جنبك ع الأرض
والجاكت بتاعك ده روح علقه ع الشماعة اللي جنب الباب
راح واخد غطاه وشنطته وجاكتته ودخل الحجرة لقي الممرض قاعد ع الفوتيه راح مقومه وقعد مكانه
وعلي فكرة هم مافصلوش الجهاز
هم مشغلينه برده بس هي تتنفس عادى
يعني لسه بيتأكدوا إنها تقدر تستغني عنه
يعني خطوة في سبيل تحقيق ذلك
* ممكن كده نطلب منهم يشيلوا الطبيب وتوفر الأجر اللي بياخده
والوجبات اللي بتتصرف له
آدى اليوم ابتدأ بالعكننة
ربنا يستر ويعدى علي خير
وأهم حاجة إن ربنا يرد لمامتكم سمعها وبصرها وأنفاسها ووعيها وتقوم بالسلامة
كنت بشتكي لها وجيعتي
وكانت بدال أمي بتسمعني وتريحني بكلمتين
مش عارف أشتكي لمين دلوقت
الحياة من غيرها مابقاش لها أى طعم!
لكن حكمة ربنا إن الأجل يطول بيا علشان أعيش مأساة ف الأيام اللي فاضلة لي علي وش الدنيا
* لو الغسيل حيطول يبقي لازم نشوف مستشفي يكون معقول
بقينا ملطشة في المستشفي المنزلي ده!
تصور لما تكون ضيف ولا تلتزم بمكان الجلوس وتقوم تعربد في الشقة!
* علي فكرة الولد لسه قاعد وباين عليه حيطبق رغم أنه امبارح قايل إنه ماشي الصبح وفيه حد حيستلم منه
كده يبقي اللي بيعمل الجدول هو المتسبب في المشاكل دى
مش عاوزين وجوه جديدة كل يوم
شغل نفس الناس اللي عارفين الحالة وتطوراتها
* الغي الطبيب مش عاوزينه ومش بيعمل حاجة وبعضهم مش عارف حاجة
، زى بتاع امبارح بيقوللي المفروض نعمل الشق الحنجرى بعد ١٠ أيام!
قلتله ازاى؟ أنا قاريها في كل المواقع ٢١ يوم أو ٣ أسابيع
* خف المصاريف وخف الزحمة في الشقة
كفاية الممرض هو اللي بيقوم بكل الشغل وبيكتب التقارير ويتلقي التعليمات
وكفاية الواقعة ديه لما الطبيب خرج من الحجرة وراح ينام ويتغطي وكأنه في بنسيون!
ليست هناك تعليقات:
إرسال تعليق