الرسائل أرقام (1و 2 و3)

 ـــــــــــــ

 (1)

الغدة الدرقية

كلامكم انتم التلاتة ع الغدد ومحاولة داليا وإسلام إقناع مامتكم وإقناعي أنا كل علي انفراد بأخذ عينة من الغدة (الدرقية غالبا اللي بتوع الدوبلار قالوا إن مافيهاش حاجة باستثناء وجود نتوء صغير) وقولهما إن مستشفي مصطفي كامل هم اللي طلبوا ذلك في آخر يوم.. وطالما إنها ماكانتش لسه حاولت تتحرك عندهم بعد العملية.. يبقوا شاكين في الغدة ليه؟ إلا إذا كان المسح الذرى اللي لم ينتظروا نتيجته لإجراء العملية كما كانوا يقولون في البداية.. هل لما ظهرت نتيجته لقوا فيها حاجة؟ خصوصا إن الناقورى لما جه أول امبارح لم يشر إلي أى غدة من قريب أو بعيد والاحتمال الوحيد اللي قاله علشان صعوبة الحركة هو الأوردة وقال بعد التحليل ممكن نشوف حد بتاع أوردة يبص عليها. ولما سألته يبقي حيطلب دوبلار تاني ع الأوردة وهي عملته ومافيهوش حاجة قال أكيد مافيهوش حاجة لأن لو فيه حاجة كانت تصرخ لو حطت رجلها ع الأرض بس ممكن تكون الأوردة عاوزة تتنشط بس وده هو شغله يعني لم يتطرق إلي حاجة اسمها غدد وسامع إن إسلام لسه ماشي في حكاية العينة بجد وطالب يعرف الأدوية اللي بتاخدها قبل سحب العينة! ممكن بقي تفهموني لأن الواحد اللي فيه مكفيه ومش ناقصنا قلق جديد!

(2)

كويس والله الأسلوب ده اللي اتفقتم عليه! اتنين قرأوا كلامي وماردوش وواحد طنش الرسالة! بس كده أكدتم ظنوني! ياترى الموضوع ده في العظام واللا الدم؟! وعلي كده تبقي الغدد المقصودة هي الليمفاوية ومش عاوزين تقولوها صراحة! وإيه اللي مسكتكم لدلوقت وجايين فجأة تتحركوا؟ رغم إن ااموضوع ده مش بينتظر أيام مش شهور؟! طيب وبعد ما تسحبوا العينة وتتحللوها.. متوقعين إيه؟ هل مامتكم في السن ده والحالة دى تتحمل علاج بكل متطلباته؟ الساعة بقت ٢وشوية ومش عارف أنام! والأمر لله أولا وأخيرا!

(3)

بعد ما كلمتني وجبتها علي بلاطة وفاجأتني بالحقيقة المرة اللي كنت إنت واخواتك مخبيينها وعاملين زى النعامة في الهروب من الواقع ، مامتك بتسألني حمادة كان بيقولك إيه في الأوضة وانت بتقول لا حول ولاقوة إلا بالله؟ عملت نفسي فاقد الذاكرة تماما وقلتلها دماغي يظهر ضربت! قالتلي المهم تكون حاجة بعيد عنه هو قلتلها لأ مالوش علاقة بيها أنا فوجئت بالسؤال وهي ماشية قدامي راجعة من الحمام! ربنا يكون في عونها ويقويها ع الأيام اللي جاية أنا بتمزق من منظرها وهي بتزحف طول النهار ومكفية علي المشاية! يارب الحالة ماتتطورش أسوء من كده يارب ماشوفها تعبانة أكتر من كده مافيش ياعيني أبو تلات اللي كانت متعتها الوحيدة ولو حاولنا ورحنا مافيش سطوح خلاص هي لغاية دلوقتي بتعافر وتدخل الحمام وتتوضا وتدخل المطبخ وتطبخ مع داليا دايما يارب حسها ونفسها معنا مش متصور إزاى أقدر أشوفها تتعذب واللا أبص حواليا مالقاهاش قدامي! ياريت أى حاجة بخصوص التشخيص واللا العلاج تتم هنا في البيت لا أنا ولا هي مستعدين لخروجها من الشقة مش عارف اللي عندها ده يعتبر موضعي واللا إقليمى يعني منتشر! يارب هون يارب عمال طول النهار أقرأ في كيفية ممارسة مريض سرطان العظام حياته العادية ربنا يلطف بيها ولا يحملها مالا طاقة لها به ويعفو عنها وبزيح عنها وياخد بإيدها يارب ماتورينا فيها يوم وحش معلهش وجعت دماغك