الرسائل أرقام من 4 إلي 7

ـــــــ الرسالة رقم 4 ــــــ

بقي انت واخواتك عارفين إن السرطان انتشر عند أمكم من ٣ شهور ومالهاش علاج وسايبينها تموت موت بطئ؟! أنا مش عارف أنام لا ليل ولا نهار! عيني كل ماتغفل من شدة التعب والتفكير ، أقوم مفزوع ع الكابوس الحقيقي اللي جالنا علي آخر أيامنا لو بإيدى ماكنتش أعيش لحظة واحدة بعد كده! أعمل إيه أنا وهي دلوقت وازاى نقدر نواجه الموقف ده واحناالاتنين في أضعف حالاتنا من جميعه؟! وهل الحل إنكم تتهربوا من الكلام معايا وتتجاهلوا رسايلي؟! مافيش غير إسلام اللي بدأ يرد علي بعضها! بس مش مقتنع بكل مبرراته! ازاى هداكم تفكيركم ، بلاش طاوعكم قلبكم ، تعملوا معانا اللي عملتوه؟! وازاى صدقتم اللي أوهمكم بإنه مالوش علاج؟! وازاى اللي حواليكم وافقوكم علي كده؟! إذا كان وقتها منتشر قيراط فهو الآن منتشر ٢٤ قيراط بسبب تضييع الوقت ده كله! لولا الانتحار حرام ، لكنت جبت حباية الغلال وحطيتها لي ولها في كوباية عصير ونخلص من الكابوس ده! هي ياعيني وشها انقلب بمجرد ماقلتلها توقف دوا التجلط علشان التحليل يوم الخميس وقالتلي ليه التحليل قلتلها علشان يشوفوا الغدة فيها إيه قالتلي وهي كلها ثقة واطمئنان مانا قلتله يصرف نظر عن موضوع الغدة!!!! أمال لما تضطر تنزل معاكم كذا مرة وتكتشف في الآخر الحقيقة؟! يعني لو المشوار ده بدأ من ساعتها كانت دلوقت متقبلة الأمر ، خصوصا وإن اكتشاف المرض كان لسه حالا!

ــ الرسالة رقم 5 ــ

 أيوة ياحمادة أنا واقف جنبها وهي بترد عليك وكنت مطلعها ع السرير علشان النوم كابس عليها رغم إنها عارفة إن الضهر أذن وكانت ساعتها بتتألم من ركبتيها مش عارفة تفردهم ع السرير رغم إنها واخدة مسكن الأورام من ساعة وشوية لكن لقيتها بمجرد ماسمعت صوتك غيرت نبرات صوتها وقالتلك كويسة ياحمادة والحمد لله بديك فكرة بس ع الماشي ولو تشوفها وهي بتتحرك دلوقت فلن تتحمل رؤيتها ربنا له حكمة علشان تبقي طالعة من عملية المفصل "بالغة الخطورة" تلقي المرض اللعين منتشر في جسمها بمافيه الركبتين يعني محتاجة لتغيير مفصلين وهي في الحالة دى مش لو بدأ المشوار في حينه من ١٠٠يوم كانت النهارده بقت أفضل؟!

ــ الرسالة رقم 6 ــ

 أمكم انهارت في البكاء بصوت عالي وهي واقفة في المطبخ مستندة ع العصا من شدة الألم وقالت المسكن مش جايب معاها نتيجة وعمالة تتساءل إيه اللي عندها وأخدتها ف حضني وقعدت أمسح لها دموعها وأطيب خاطرها علي قد ماقدرت لكن حرام تسيبوها كده وتطمنوا علبها بالمراسلة وأنا لوحدى قربت أنهار قبل منها حد ييجي يقعد معاها ضرورى يونسها يشجعها بكلمتين أنا لا قادر أنام ولا أكل ولا أشرب وأتمني ربنا يعجل بأجلي في هذه اللحظة مش معقول أشغالكم أهم من حياة أمكم!

الرسالة رقم 7 ــ

  فكرتك لما قريت الكلام ده مامتك صعبت عليك! أتاريك بتقول لداليا نمرة الدكتور معاك ع الموبايل ولما تروح تشوفها وتبعتهالها!!!! يعني علي راحتك و أقل من مهلك! هي الدنيا طارت؟! أمك بتنازع من الوجع وداليا بتعمل لها كمادات بدون جدوى ياقلوبكم! مستنيين لما المرض اللي لايرحم يصيب أعضاءها الداخلية؟! وتكمل موت بطئ؟!