بكائيات عبد السلام

  ــــــــــــ

* الشق الحنجري

* وداد في ذمة الله

* "المرحومة" أمر واقع!

* مرور أسبوع علي وفاتها

* وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً

* تعلمت منها

* صعوبة الحياة بدونها  

* الترحم عليها كلما رأيت مخزونها التمويني 

* أجمل الذكريات خلال "أيامنا الحلوة"! 

* ذكرياتنا المكتوبة معاها 

* صدقة جارية علي روحها الطاهرة

الأيام الصعبة في حياة رفيقة عمرى: السبت والأربع والخميس24و 28 و29

 ـــــــــــــــــ

* النهارده السبت ٢٤ فبراير والساعة تقترب من الثانية صباحا امبارح كنا مبسوطين وهي تستجيب نوعا للأوامر وكانت يضغط علي الخراطيم المارة بفمها والدكتور إسلام والممرض إيهاب حاولوا فصل جهاز التنفس وتركها تتنفس طبيعيا ولكنها تعبت جدا فاضطروا لإعادة التنفس الصناعي واتضح إن الكلي لم تفرز بول طول النهار وبعد انتهاء جلسة الغسيل التالتة الدكتور قال أنها حاليا تعاني من احتقان شديد لي الصدر وارتباك في الوعي بسبب الماء المتراكم في جسمها وطالما إن الكلي مش جايبة ميه يبقي لازم من جلسات أخرى للغسيل وبالفعل حضر الفني وبدأ الجلسة حوالي الساعة ١١ م. ياسر عاد للرياض في وقت مبكر صباح أمس الجمعة وداليا عاوزة تروح الشغل باكر الأحد طلبت منها التوجه للبيت الليلة لقضاء اليوم السبت مع أولادها والاستعداد للتوجن للعمل في اليوم التالي ولكنها قالت إن هدومها في الغسيل سأحاول تركها تروح بيتها النهارده وتبات مع عيالها وتتوجه بكره لعملها وعرفت منها ازاى تحضير الوجبة السائلة لوالدتها وهي دلوقت استأذنت للنوم ساعة ، مما جعلني أحضر البطانية للنوم علي الكنبة وإعطائها الفرصة لمواصلة النوم للصباح سفر إسلام وياسر تركوا لنا فراغ جامد وخاصة فيما يتعلق بالتعامل مع الطاقم الطبي وتلبية احتياجاتهم ومع إدارة المستشفي ولو كان حمادة موجود كان يحل محل داليا لما تضطر للرجوع لشغلها. تأثرت جدا برؤية وداد عن قرب النهارده بناء علي طلب التمريض لعلها تسمع صوتي وتتنبه ربنا قادر يشفيها ويزيح عنها ويأخذ بيدها إلي طريق الشفاء التام ويرد إليها صوتها وبصرها وإحساسها وحواسها وصحتها وعافيتها ووعيها.

*  النهارده الأربع ٢٨ 

داليا في الشغل وأنا بمفردي 

بتوع العناية طلبوا ملايات وبياضات علشان عاوزين يغيروا لوداد ، ماكانش عندى فكرة ، قلت لمصطفي تعالي معايا نشوف الغسيل اللي ع الكنبة ، وهو ماشاء الله أخد القطع اللي عاوزها وكيس مخدة أخد من الحمام كروانة وقطعة صابون ، وأنا أعطيته قطعة أخرى جديدة سأل علي تلج قلت له شوف في التلاجة راح دور مالقاش 

كانت يد وداد تتحرك بقوة وقالوا إنها حاسة ،وقعدوا يكلموها 

استأذنت منهم للنوم وطلبت من مصطفي يخلي ودنه مع الباب ومايسبهوش مفتوح لقيت الممرضة واسمها دينا بتسألني لو عاوز حاجة وعما إذا كنت فطرت واللا لأ فشكرتها

 * أخدت امبارح الجلسة رقم ٧ البول زى ماهو مافيش ، مش عارف الجلسات حتستمر لإمتي وازاى نصدوا علي مصاريفها ، هي لسه درجة الوعي عندها مش كافية لفصل جهاز التنفس الصناعي عنها * يعني عندها مشكلتين: الكلي والوعي 

النهارده عندنا طقم طبي في منتهي الذوق والأخلاق دكتورة وممرض ، طلبوا ملايات وبياضات وكيس مخدة وكروانةوصابون علشان يغيرولها ، قلتلهم ماتخليكم لما تيجي بنتها تساعدكم قالولي مافيش داعي ، وجاى أستأذن للنوم سألتني الدكتورة إن كنت عاوز أفطر كتر خيرها ، جه مندب الأورمان ياخد اللي فيه النصيب لقيت الممرض بيصحيني بهدوء ، وجيت أقوم من السرير لقيته بيمد إيده يساعدني ، وإديته الفلوس وعدها وطلع سلمها للمندوب وجاب لي الإيصال

* حضر اللي اسمه ماجد يوسف اللي ورطنا أصلا في العودة للعناية وهي ماكانتش محتاجة للعناية وكان الموضوع أبسط من ذلك بكثير المهم إنه جاى يخطرنا بأنه لا مفر من إجراء الشق الحنجرى ولما سألته داليا عن نتيجته قال لها بصراحة إن فيه حالات بتشفي فلما سمعت هذا الكلام انفتحت فيه وقلتله كل ده منك انت اللي ورطني ورجعت العناية وهي كانت حالتها لاتحتاج سوى إيقاف الدوا المدر للبول وعمل اللازم نحو رفع الضغط وقعدت أدعي ع اللي تسبب في وصولها إلي هذه الحال واتصلت بإسلام وأخبرته بسرعة الحضور فقال إنه غير موافق علي عمل الشق الحنجورى وبالفعل حضر صباح اليوم وطلب الإسعاف وتم نقلها إلى مستشفي جمال عبد الناصر ومعه داليا والطاقم الطبي الموجود واتصل بي من هناك وأخبرني بأنها دخلت وهي موجودة الآن في الاستقبال ومنتظرين يشوفوا الخطوة الجاية ٱيه

* بقدر حزني علي رؤية وداد وهي تخرج من الشقة علي نقالة الإسعاف وهي في هذه الحالة الصحية الخطيرة ويدها تتحرك نحو رأسها علي مايبدو لتنتزع الأنابيب المؤلمة من بقها واللي استمرت ٢٢ يوما وهي متوصله بجهاز التنفس الصناعي البديل ومحاطة بالاقم الطبي بتاع كير هب وأمين حارس العقار وإسلام وداليا والله أعلم إذا كانت راجعة واللا لأ بقدر شعورى بالارتياح وتتفس الصعداء بعد التخلص من تلك العناية المركزة الوهمية بوجوه العاملين فيها وخاصة لعمال المسئلين عن هلتف عن الفنيين بتوع الغسيل الكلوى واللي انتهكوا خصوصيات البيت ودهسوه طالعين نازلين كما يتراءى لهم في أى ساعة بالليل والنهار

* الساعة 10.30 م الخميس ٢٩ منه ، مبيت وداد في العناية المركزة بمستشفي جمال عبد الناصر للتأمين الصحي ، وقد عاد إسلام وحده بعد انتهاء إجراءات الدخول ، بينما عادت داليا إلي بيتها دخل إسلام للنوم وجلست ع الكنبة لمتابعة أخبار الحرب علي غزة من خلال شاشة الجزيرة ، ووقعت عيني علي الآرش فلم أجد وداد ، فنظرت إلي حجرة البلكون متخيلا أنها نامت علي أحد السريرين ، فتذكرت أنها في المستشفي! ربنا مايغيب لها حس وقادر يشفيها ويقومها بالسلامة وترجع شقتها لتملأها حيوية ونشاط وتؤنسني في وحدتي

الأيام الصعبة في حياة رفيقة عمرى: الجمعة 1مارس وما بعده

 ـــ الجمعة ١ مارس الساعة ٣,١٥ ـــ

*  أم إبراهيم خلصت تنفيض وغسيل واشتغلت النهارده كتير حتي التكييف غسلته! ولما أخدت أجرتها المعتادة وهي ٤٠٠ جني لقيتها استدارت و قالت:مافيش حاجة زيادة النهارده؟ قلت لها:والله لو كان معايا كنت إديتك. وليةطماعة! دى المرة اللي فاتت لما شافت الحاجة علي جهاز التنفس الصناعي واحنا ملخومين كلفتت الشغل وطلعت تجرى حتي الحاجات اللي دااليا طلبتها تتعمل ، ماعملتهاش. ماعلينا 

وقبل ماتمشي كان إسلام استاذن للذهاب في زيارة مامته في المستشفي ثم إلي القاهرة حيث يستعد للسفر إلي الرياض

للأسف!

وأصبحت الآن ولأول مرة بعد خروجها من المستشفي العسكرى وحيدا في الشقة! وكأنها بروڤة للأيام القادمة!!! ربنا يشفيها وتقوم بالسلامة وترجع شقتها وتونسني في شيخوختي

* بعد انصراف إسلام ووراءه أم إبراهيم حوالي الساعة 3.15 ، لم يعد لي صلة مباشرة أو غير مباشرة مع أحد ، كلما غفوت ولو ثواني وافتح عينيا ، أبص علي الفوتيه بتاع شريكة الحياة حيث كانت تجلس خلال الأشهر الأخيرة وأفاجأ بعدم وجودها!

ــ الأحد 3 ما رس ــ

انعاش القلب

عرفت من إسلام إن ماما تعبانة النهارد ه وإن القلب توقف امبارح وعملولها إنعاش بس لسه ماعملوش شق حنجرى وإنهم النهارده حيغسلوا الكلي ويمكن تأخرهم في الغسيل هو اللي خلاها تعبت لأنه لازم يوم بعد يوم

تصور وصلت لإيه وكانت كويسة قبل ماتدخل العناية دى ومتحملة الألم بقالها سنتين. كانت مسلياني في وحدتي

 

خليت أمين يجيبلي فشار من العلاف وقمت حمصته  هي اللي علمتني أحمصه ازاى وأنا بحبه خصوصا لما عرفت إن نسبة البروتين فيه حوالي ٣٪ بس بعكس السوداني اللي غني بالبروتين اللي مرفوض بالنسبة للكلي

ياعيني آخر مرة جت تعمله وكانت قاعدة ع الكرسي المتحرك وهي قدام البوتاجاز اتحرق منها وزعلت جدا لأنه كان مخزون من مدة طويلة  

ــ الاثنين 4 مارس ــ

* قمت من النوم متضايق بسبب الحلم اللي شوفته بخصوص وضع الشقة في انتظار عودتها ماكانش واضح وكأنه كابوس 

*    بقيت لوحدى خلاص مش عارف راجعة واللا خلاص

*   ربنا يلطف بيها وبينا ويهون عليها وعلينا ويجعل الحياة زيادة لها ولنا في كل خير ويجعل الموت راحة لها ولنا من كل شرو يجعل الموت راحة لها ولنا من كل شر

 * 3 مناسبات سعيدة قادمة أدعو الله سبحانه وتعالي أن تأتي ورفيقة العمر موجودة معانا وقد من الله عليها بالشفاء التام سبحانه إذا قضي أمرا إنما يقول له: كن فيكون

ــ التلات 5 مارس ــ

  لا طعم للحياة نهائيا وصورتها لا تغيب عن ذهني وهي تمتص بطريقة متلاحقة ، "الخراطيم" وليس "الأنابيب" الممتدة داخل جسمها إلي القصبة الهوائية والمعدة ، ولعابها يسيل للخارج بغزارة لعدم قدرتها علي البلع! رغم أن أحدا لا يطيق شعرة صغيرة فوق لسانه وداخل فمه! ناهيكم عن تحمل آلام دخول مستشفيات وإجراء عمليات ومحاليل وتحاليل وتجرع أدوية لا أول لها ولا آخر وضرب حقن بمختلف الأنواع وتردد دكاترة في العديد من التخصصات ، ثم تختم بتحمل تجارب تلك "المشرحة" أو أكذوبة "المستشفي المنزلي" التي تورطنا فيها! كما يظل يرن في أذني صوتها وهي تقول: "كل ماتتكلموا عن المستشفيات تيجي فيا"! وأخيرا تخضع لعملية إجراء شق حنجرى!!! دماغي حتنفجر من التفكير والندم لأننا انخدعنا بمايسمي "العناية في المنزل" ، وقلبي حينفطر من الحزن والأسي والإحساس بالذنب نحوها! لاحول ولا قوة إلا بالله العلي العظيم! أعانها الله وهوّن عليها وقوى إيمانها وجعلها في النهاية في ميزان حسناتها، ومش بعيد علي الله يطلق لسانها ويرد إليها سمعها وبصرها وتسترد كامل وعيها ، ونبقي نفكرها بهذه التجربة الأليمة ، بل الدراما الحزينة!

ــ الأربعاء 6 مارس ــ

*    اللي مزعلني إنها كانت بتتألم بقالها سنتين وصابرة تبقي تاخد مكافأة نهاية الخدمة بالشكل ده ويموتوها فطيس/ تقريبا شايفينها ميئوس منها فموفرين مجهودهم/ صيبها بس حفضل بقية أيامي فاكر شكلها لما حءت بالأنابيب المحشورة في بقها بقت تمص فيها ولعابها يسيل بغزار ة لعدم قدرتها ع البلع وةلأنابين داخلة في الحلق لغاية المعدة والقصبة الهوائية وعاوزة تتخلص منها/ ده الواحد او حس بشعرة علي لسانه مش بيرتاح إلا لما يطلعها/ صعبانة عليا قوى وزعلان من نفسي إني وافقت أدخلها العناية دى وهي ماكانتش محتاجة لها/ عني ماكانتش عيانة قوى علشان نقول بعد صراع مع المرض كل الحكاية إن ضغطها انخفض بسبب مدرات البول اللي هم كتبوهالها وكان حلها وقف المدرات/ هي داليا وإسلام اللي قعدوا يلحوا عاوزين حد يتابعها بعد خروجها أول مرة فجه منه لله اللي أمر بعودتها للعناية وقعدوا يتعلموا فيها لما ضيعوها/ نصيبها وداخل عيد الأم ورمضان وليلة الرفرافة/ أكيد هي سظعت كلامنا

ــ الخميس 7 مارس ــ

بدأت أعاني من الأرق بسبب التفكير في وداد مش قادر أعيش من غيرها وكل مافتكر منظرها وهي عمالو تمص في الأنابيب المحشورة في جسمها ، صعبانة عليا جدا ، أكيد متضايقة منها ومش عارفة تعمل فيها إيه! ياربي! كمان لما افتكر إنها ماكانتش عيانة ولا في حالة صراع مع المرض ، علشان في خلال شهر علي جهاز التنفس الصناعي الشؤم ، تبقي بين الموت والحياة كلام إسلام نقلا عن داليا إنها تعبانة بقالهأ يومين ومافيش تحسن ، ولهجته تدل علي فقده الأمل! بيقول السيولة عالية وبيحاولوا يظبطوها علشان بديعملوا الشق الحنجرى! معقول حتعيش بعد كده؟

الساعة 2.30 ومش جايلي نوم كانت هي اللي بتحب تسهر ولما كنت أقوم أستعد للنوم تسألني بقلق: حتنام؟ ولما تلاقيني خلاص حنام تقوللي : طيب هات الريموتات جنبي وكنت أنا بنبسط لما أحاول أنام وهي فاتحة التليغزيون. ربنا يزيح عنها وقادر يشفيها وده شئ مش بعيد علي الله ، ولو إن كلام إسلام نقلا عن داليا غير مطمئن!/ ا

لساعة بقت 3.30 (11)

الأدوات التي كانت وداد تستعملها (1): مأكولات

   ــــــــــــــــ

(1)

(2)

* حلاوة المولد: كنت حريصا علي شرائها خلال المواسم وكنت أشتريها من مصنع خليل الحلواني في باكوس ،وكانت هي تحبها ، وآخر مرة كلفنا سامح بشرائها منشهد الملكة ، وللأسف الشديد لم تتناول قطعة واحدة بسبب دخول العناية "المهببة"!

* علبة الشاى وكانت تخلط فيها الشاى الناعم بالشاى الخرز

وجبة الفطار

الفلفل الحامي
* فطورها ويتكون عادة من: كوب الشاى الممتلئ حتي الحافة ، قليل من اللبن تحت ضغط الزوج ، الجبنة البيضة الناشفة ، بيضة واحدة مسلوقة أو مقلية ، خيارة أو ورقتين خس أو جرجير ، زيتون أسود أو أخضر ، ملعقتان مربي من صنع يديها ، رغيف محروق (بكسرالميم وفتح الواو)وغالبا لاتأكله كله)

(1)

(2)

(3)

(4)

* البطاطس: وجودها في البيت أساسي ، وكانت تجيد قلي البطاطس وصينية البطاطس

* آخر مسليات وقطع شيكولاتة كانت تنوى تناولها خلال السهر ولكنها دخلت "العناية" المشئومة!

* شالية اللبن الرايب: وقد أحضرتها معي خلال عودني من رشيد أكتر من مرة ، حيث كانت تفرح بأىة مأكولات تذكرها بمأكولات الطفولة في طنطا وشبين

(1)

(2)

لب

(3)
* الجبنة القديمة: من مأكولاتها المفضلة: تحتفظ في وعاء (بلاص أو زلعة)خاص بخميرة الجبنة القديمة التي تسلمتها من تيزة الله يرحمها وظلت تغذيها كل وقت وآخر ، ومن الوعاء تضع كمية صغيرة في برطمان بالتلاجة ثم علبة صغيرة لسهولة الاستعمال

* البامية الخضراء: وكانت تفضل الرومي عن الفلاحي ، ولكنها لاتمانع في طبخ الفلاحي التي أفضلها

*  كانت ترفض حشو بطن السمكة بمعرفة السماك في حالة تنظيفها، وذلك لعدم الاطمئنان إلي نظافة مواد الحشو أولا

بكائيات عبد السلام: الشق الحنجرى!!!!

 ـــ الشق الحنجرى ـــ

* أدينا بندعي ليل مع نهار ومع كل طلعة نفس ربنا يلطف بيها ويهون عليها ويقويها وياخد بإيدها ويشفيها أنا دموعي لم تجف النهارده بسبب صورتها اللئ سيطرت علي دماغي وهي تمتص الخراطيم المتددة داخل جسمها ولعابها يغسل هذه الخراطيم اللي مسببالها إزعاج لا يتحمله إنسان وكأنها تحاول التخلص منها بدون جدوى! ياريتني ماشوفتها ، وأنا كنت بتجنب النظر إليها من ساعة ماحطوها ع الجهاز ، لولا إنهم نادوني لما شافوها بتستجپب معتقدين أنها لما تسمع صوتي حتفوق! 

* لا حول ولا قوة إلا بالله! أمال لما يعملوا كمان الشق الحنجرى حتعمل إيه؟! 

* منهم لله اللي تسببولها في كل اللي حصل وربنا يخرب بيوتهم البعدا.. عملوها حقل تجارب وجابولها أسوء حاجة ينتظرها المريض! وهي لاتستحق حاجة من دى خالص ، إنسانة طيبة وفي حالها وأميرة وتحب الناس كلها وعمرها ماتجيب سيرة حد ولو سمعتني دلوقت وأنا بشتم فيهم وبدعي عليهم كانت حتزعل مني وتقوللي بلاش شتيمة وحرام تدعي علي حد! 

* أنا خلعت ضرس والتاني في الطريق وحياتي اتلخبطت ع الآخر ، بصلي ومش عارف صليت إيه واتوضيت وبنشف لقيتني ماغسلتش رجليا وطالع م المطبخ رايح الحمام لقيت نفسي قدام البلكونة وإعلانات التليفزيون عن رمضان وأغانيه ومسلسلاته اللي الناس منتظراها فقدت طعمها ومذاقها اللي اتعودنا عليه طول عمرنا ، ومش عارف آخرتها إيه!

* وبعدين في المشكلة دى! عيني غفلت قدام التليفزيون ولما فتحت بصيت عليها شايفاني لما نمت واللا لأ ، مالقيتش حد قاعد! ودى مش أول مرة أنا بصحي ف الفجر ومتهيألي إنها موجودة ، وبعدين أفوق علي الصدمة ! علشان كده بفكر جديا في دار المسنين اللي باعتينلي الأسعار بالاسم وكأنهم عارفيني!

* زى التوقيت ده كانت متعودة تاكل حاجة بسيطة في بعض الأيام ، وكانت هذه الحاجة لا تتعدى حتة جبنة بيضا ولقمة ناشفة صغيرة وخيارة أو ورقتين خس أو جرجير وكنت أنا في معظم الأوقات اللي أعرض عليها: أجيبلك إيه تاكليه؟ وأحيانا أكون مش واخد بالي ألاقيها تقوللي: مش عاوز تاكل حاجة؟ فأرد عليها: ماشي ، أجيب إيه؟ ولو مش جعان أقول لها: حاضر حجيب لك اللي انتي عاوزاه بس أنا مش عاوز ، وأحيانا أكون أنا ليا نفس للأكل ، خصوصا لما يكون عندنا عيش فينو من فتح الله بيجيبه سامح ، وألاقيها هي مالهاش نفس أقعد أتحايل عليها علشان تاكل معايا ، فتستجيب وتقوللي طيب هات حتة جبنة وربع رغيف ، فأقوم بوضعها في التوستر بدلا من تسخينها ع البوتاجاز زى العيش العادى ، مما يجعلني في منتهي السعادة! دلوقتي أنا عايش في الماضي اللي للأسف انتهي بالشهر اللي قضته في العناية وحصل خلاله ماحصل ، وما لم نتخيل حدوثه في يوم من الأيام! أما الحاضر فهو المشكلة الحقيقية! 

* أنا في الآونة الأخيرة كنت أدعو الله عندما آوى إلي فراشي أن يجعل يومي قبل يومها ، وكنت أتوسل إلي الله في هذا الدعاء ، وخايف ربنا مايستجبش لدعائي ويتفرض عليا إني أشوفها هي تسبقني وأقعد أنا أتجرع مرارة الفراق! وللأسف ماكنتش أتوقع يحصل لها كل اللي حصل ده وأشاهده أنا بنفسي وأمام عينيا! ويتملكني شعور بأن فيه حاجة غلط حصلت! وهي أن وداد كانت ضرورية جدا لاستمرار حياة العائلة وردية وترفرف عليهاأجنحة البهجة والسعادة ، أما أنا فإن وجودى علي قيد الحياة أصبح زى عدمه بالضبط ، وباختصار شديد: لو حصل لوداد حاجة يبقي البيت ده اتخرب! وأكون أنا الشاهد علي هذا الخراب! فماذا أقول غير: حكمتك يارب! يارب ياعالم بحالي أنت غني عني وعن سؤالي اللهم هئ لها مافيه الخير واجعل الحياة زيادة لها في كل خير واجعل الموت راحة لها من كل شر وهون عليها والطف بيها.. مش قادر أدعى أكتر من كده ، بعدما أصبحت الأمور تزداد تعقيدا كل يوم والتاني

الكرسي متعدد الأغراض

* الكرسي متعدد الأغراض مقر إقامتها ومعيشتها ونومها ويقظتها وعليه الملايات والبطانية بعدما أرسلها إسلام للمكوى وتم توجيهه نحو الاتجاه الصحيح للقبلة لكي تصبح صلاتها مضبوطة يارب ترجع تصلي عليها وتقرأ القرآن لكي تظل البركة داخل البيت

* ساعة واحدة اللي نمتها! مش قادر أنسي منظر الخراطيم الممتدة داخل بقها! هي لو حاسة بنسبة ١٪ تبقي مصيبة! أزاى هي تتحمل مثل هذا الجسم الغريب المؤلم المزعج المقلق للراحة؟! تجربة صعبة فوق الوصف وأنا مش عارف ازاى بيحاولوا يفوقوها وهي متمزقة من جوه بفعل هذه الخراطيم الصلبة؟! ده المفروض يتخلصوا من ده كله وبعدين يفوقوها! لكنهم لسه ناويين يعملولها شق حنجرى! يعني لسه قدامها مرحلة جديدة من العذاب! ياربي! بقي بعد عذاب سنتين كاملتين مابين كسور وعمليات وآلام مستمرة آناء الليل وأطراف النهار..تبقي دى مكافأة نهاية الخدمة اللي تستحقها؟!. أستغفر الله العظيم. أنا حيجيني لوثة أو هستريا أو شلل رباعي من كتر التفكير! والعمل !؟ أنا عندى مايملأ فراغ أى إنسان عندى عدد ٦١ مدونة لو قعدت ٢٤ ساعة أشتغل فيها وفي تحديثها وتغذيتها مش حيكفي وعندى منشوراتي المتجددة من خلال خساباتي العديدة ع الفيسبوك وتويتر والتي تتضمن آرائي وتعليقاتي علي الشأن العام والأحداث الجارية والحياة الثقافية وبرامج الإذاعة والتليفزيون ولكني لم أعد لدى الرغبة ولا الإرادة ولا العزيمة ولا الدوافع ولا الظروف النفسية المشجعة! حاجة واحدة اللي شاغلاني وشاغلة تفكيرى ، عما لحق بشريكة حياتي ورفيقة عمرى خلال الشهر الأخير وإيه اللي خلاني أوافق علي عودتها للعناية وكل الحكاية تتمثل في انخفاض مفاجئ في الضغط ، وكان علاجه في منتهي البساطة بوقف الدوا المدر للبول اللي هم كتبوه وإعطائها حاجة حادقة أو مالحة وعندها الجبنة القديمة اللي بتموت فيها ، وكان الضغط اتظبط وبعدين نعيد النظر في مدرات البول المناسبة ، مش نسمع كلام منه لله اللي طلبناه لمتابعتها فإذا به يغرقنا ويورطنا ويدخلنا ف متاهة مش عارفين نخرج منها ، وعمل منها حقل تجارب لناس لسه بيتعلموا الطب وعاملينلي فيها استشاريين ، وهم كل خطواتهم غلط في غلط وكل خطوة تنقلنا إلي ماهو أسوء ، حتي حطوها علي جهاز التنفس الصناعي وبعده ماكينة الغسيل الكلوى وبعده الشق الحنجرى ، وياعالم تنتهي علي إيه!

* خلاص مافيش نوم الليلة حقوم أتوضا وأصلي ركعتين وأقرا شوية في القرآن علي مايؤذن للفجر واضح إني داخل علي نوبة أرق جديدة وسبحان اللي يخرجني منها كانت بتشاركني شوية من الأرق ده لكن دلوقتي المفروض أدور علي منوم!

 

ـــــــــــ